Ака уйăхĕн 23-мĕшĕнче чăвашсем пурăнакан пĕтĕм хулапа ялта Чăваш чĕлхи кунне, Раççейри Тăван çĕршыв хÿтĕлевçи ҫулталăкне тата Чăваш Енри Çĕнтерÿпе патриотлăх çулталăкне халалланă «Пĕтĕм чăваш диктанчĕ – 2025» акци иртрĕ.

Çак акцин тĕп тĕллевĕ – халăха чăваш чĕлхине вĕренме явăçтарасси, пуплев культурин шайне çĕклесси, чăваш чĕлхин пĕлтерĕшне Чăваш Республикинче, Раççей Федерацийĕн регионĕсенче тата чикĕ леш енче сарасси, чăваш чĕлхин сумĕпе хисепне ÿстересси.

Патăрьелĕнчи 1-мĕш вăтам шкулта вĕренекенсемпе вĕрентекенсем те çак акцие хастар хутшăнчĕç. Вĕсен шутĕнче 7-11-мĕш классенче вĕренекен 26 ачапа 3 вĕрентекен. «Пиллĕк» паллă илнисен шутĕнче 8 ача тата 3 учитель. «Тăваттă» илекенсем 9 пулчĕç, «виççĕ» паллă илнисем вара пурĕ 9 ача. Шкул ачисемпе вĕрентекенсем хăйсен пĕлÿ шайне тĕрĕслерĕç тата Аслă Çĕнтерÿшĕн пурнăçне шеллемесĕр кĕрешнĕ салтак çинчен, Çĕнтерÿ кунĕ çинчен пĕлнине çирĕплетрĕç..

«Пĕтĕм чăваш диктанчĕ – 2025» акцин пĕлтерĕшĕ чыслă та сумлă. Çакна ачасем туясса, ăша хывасса шансах тăратпăр

Путякова Н.А., чăваш чĕлхипе литературине вĕрентекен