Ака уйăхĕн 26-мĕшĕнче, чăвашсем пурăнакан пĕтĕм хулапа ялта Чăваш чĕлхи кунне тата И.Я. Яковлев çуралнăранпа 175 çул çитнине халалланă «Пĕтĕм чăваш диктанчĕ – 2023» акци иртрĕ.

Çак акцин тĕп тĕллевĕ – халăха чăваш чĕлхине вĕренме явăçтарасси, пуплев культурин шайне çĕклесси, чăваш чĕлхин пĕлтерĕшне Чăваш Республикинче, Раççей Федерацийĕн регионĕсенче сарасси, чăваш чĕлхин сумĕпе хисепне ÿстересси.

Патăрьелĕнчи 1-мĕш вăтам шкулта вĕренекенсемпе вĕрентекенсем те çак акцие хастар хутшăнчĕç. Вĕсен шутĕнче 7-11-мĕш классенче вĕренекен 50 ачапа 3 вĕрентекен. «Пиллĕк» паллă илнисен шутĕнче 21 ача тата 3 учитель. «Тăваттă» илекенсем 19 пулчĕç, «виççĕ» паллă илнисем вара пурĕ 10 ача. Шкул ачисем хăйсен пĕлÿ шайне тĕрĕслерĕç тата И.Я. Яковлев çинчен çĕннине те пĕлчĕç.

«Пĕтĕм чăваш диктанчĕ – 2023» акцин пĕлтерĕшĕ чыслă та сумлă пулнине ачасем туйрĕç, ăша хыврĕç.

Чăваш чĕлхипе литературине вĕрентекенсем