Авăн  уйăхĕн  5-мĕшĕ  – СССР  летчик-космонавчĕ, авиаци генерал-майорĕ, Совет Союзĕн икĕ хут Геройĕ, Чăваш Республикин хисеплĕ гражданинĕ Андриян Григорьевич Николаев çуралнă кун.

Кăçал   Чăваш çĕрĕ çинче çуралнă пĕрремĕш космонавт, наци паттăрĕ, пĕтĕм тĕнче пĕлекен тата юратакан çын  90 çул тултарнă пулĕччĕ.

Патăрьелĕнчи  1- мĕш вăтам шкулти  4а класра  Чăваш ятне тĕнче уçлăхне çĕкленĕ паттăра  халалланă  урок иртрĕ. Вĕренекенсем  А.Г.Николаев ачалăхĕпе, вĕренÿ çулĕсемпе тата тава тивĕçлĕ ĕçĕсемпе тĕплĕн паллашрĕç.

Виççĕмĕш космонавта Раççейĕн тата ют çĕр-шывсен вун-вун наградипе палăртнă. Унăн хушаматне Чăваш Енĕн Ĕç Мухтавĕн тата Паттăрлăхăн Хисеп кĕнекине чи малтан кĕртнĕ.  А.Г.Николаев – пирĕн республикăн, Калуга, Каспийск, Махачкала, Нальчик, Ржев, Смоленск, Караганда, София тата ытти  хуласен хисеплĕ гражданинĕ. Чăваш Енĕн çăлтăр ывăлĕн ятне Уйăхăн леш енчи кратера, Франц Иосиф çĕрĕн архипелагĕнчи пĕр купола, Антарктидăри хысака, карапсене, нумай-нумай урампа шкула, çамрăк космонавтсен отрядне панă. Шкул ачисем вĕрентекен каласа панине  кăсăклансах итлерĕç.

Ентешĕмĕр паттăрлăхне пирĕн яланах асра тытмалла, унран тĕслĕх илмелле. Çакăн пек пĕтĕмлетÿ турĕç ачасем.

                                                                                   Федорова  В.Ф.