2022 çулхи ака уйăхĕн 29-мĕшĕнче Чăваш Республикин тĕп хулинче чăваш чĕлхипе литературин Пĕтĕм тĕнче олимпиади иртрĕ. «Чăваш чĕлхи – тăван чĕлхе» ятпа иртекен олимпиада И.Н. Ульянов ячĕллĕ Чăваш патшалăх университетĕнче пулчĕ. Ăмăртăва Чăваш Республики, Тутар Республики, Чĕмпĕр облаçĕн шкулĕсенче 9-11 классенче вĕренекен 37 ача хутшăнчĕ. Вĕсем пурте кăçалхи регион шайĕнчи олимпиадăн çĕнтерÿçисемпе призёрĕсем.

Çак олимпиадăна Патăрьел районĕнчен 7 вĕренекен хушăнчĕ. Тăван чĕлхепе литературине чи лайăх пĕлнине кăтартас, пуринчен те пултаруллă пулнине çирĕплетес тесе тăрăшрĕç ачасем. Хĕрÿ тупăшура Патăрьелĕнчи 1-мĕш вăтам шкулта вĕренекен Муллина Ю. пĕтĕм тĕнче олимпиадин çĕнтерÿçи ята тивĕçрĕ. Вăл вырăс чĕлхиллĕ шкулта чăваш чĕлхипе литературине вĕренекен 10 мĕш класс ачисен хушшинче чи маттурри пулчĕ.

Муллина Юльăна, ăна вĕрентекен Солдатова С.А., Путякова Н.А. саламлатпăр, малалла та пысăк çитĕнÿсем тума сунатпăр.

Путякова Н.А., чăваш чĕлхипе литератури вĕрентекенĕ