Патăрьелӗнчи 1-мӗш вăтам шкулта чăваш чӗлхипе литературине вӗрентекенсем нарăс уйăхӗн 18-мӗшӗнче Тури Туçа вăтам шкулӗнче иртекен районти XII методика фестивальне хутшăнчӗҫ. Ăна Тăван çĕр-шыв хÿтĕлевçин çулталăкне халалланă. Мероприятин тӗп тӗллевӗ – чăваш чӗлхине вӗрентекенсен пӗр-пӗрне хăйсен ӗҫ опычӗпе паллаштарасси, ӗҫре ҫӗнӗ технологисемпе усă курасси.
Фестивале Патăрьел районӗн шкулӗсенче вӗрентекен пур чăваш чӗлхи учителӗ те хутшăнчӗ. Конкурс тĕрлĕ номинаципе иртрӗ. Патăрьелӗнчи 1-мӗш вăтам шкул вӗрентӱҫисем Путякова Н.А., Каллина О.А. тата Лукьянова О.В. «Чи лайăх класс тулашĕнчи ĕç» («Лучшее внеклассное мероприятие»), «Урок-проект» тата «Чи кăсăклă класс тулашӗнчи ĕç» («Самое увлекательное внеклассное мероприятие») номинацисен ҫӗнтерӱҫисем пулса тăчӗҫ. Пирĕн шкул учителĕсем ачасене Тăван Çĕр-шывăн Аслă вăрçин историйĕпе паллаштарчĕç, вăрçă паттăрĕсене аса илчĕç, салтаксем çырнă вăрçă вăхăтĕнчи çырусене тишкерчĕç. Экспертсем асăннă вӗрентекенсен ӗҫӗсене, уроксенче усă куракан технологисене ҫӱллӗ шайра хакларĕç.
Чăваш чĕлхипе литературине вĕрентекенсене малалла та хастар ӗҫлеме ăнăҫу сунатпăр!
Путякова Н.А., Каллина О.А., Лукьянова О.В.,
чăваш чӗлхипе литератури вӗрентекенĕсем |