Кĕрхи çанталăка кĕске ăслă тенĕ-ха  пирĕн ваттисем. Чÿк уйăхĕ пиркиех каланăн туйăнать ăна. Анчах раштав уйăхĕнче те  çанталăкĕ чӳк уйăхĕнчи пекех  йĕпе-сапаллă, юрлă-çумăрлă. Хĕлле пулчĕ тесе кĕрĕксене те хускатрăмăр, анчах, курăсăн— урамра йĕпе, йĕпе юр та  чашлаттарать.

Çакăн пек çанталăк кĕçĕн çулхи ачасемшĕн хăрушăрах, мĕншĕн  тесен кÿлĕсемпе пĕвесем çийĕнчи çÿхе пăр, куçкĕски пек йăлтăрккаскер, таçтанах çуталса выртаканскер, ытларах вĕсене илĕртет  те.

Инкек-синкек сиксе ан тухтăр тесе Патăрьелĕнчи пĕрремĕш вăтам шкулти  2-мĕш «В» класс ачисем чăваш чĕлхи урокĕнче хăрушсăрлăх правилисене аса илчĕç, «Асăрханăр:  çÿхе пăр улталать!» темăпа калаçусем ирттерчĕç.

Калаçу вĕçĕнче ачасем  «Чтобы не было беды» ятлă презентаци пăхрĕç, ыйтусем пачĕç, хуравĕсене те хăйсемех тупрĕç.

Аслăрах классенче вĕренекенсен те, ашшĕ-амăшĕн те тимлĕ пулмалла, кĕçĕннисене сăнасах тăмалла, асăрхаттармалла.

Федорова В.Ф.